有人話, 跌一次, 大三斤………

話說呢一個晚上, 一如平常咁, 餵好奶後就放靖天上我地張床到休息…… 因為佢鑊鑊都食唔曬枝奶, 所以都慣左等佢訓一陣, 晏少少再餵……

咁見佢訓左, 就行返出房, 上下网, 休息下……

點知隔左3-4個字, 突然聽到房間傳來”嘭”一聲…… 心入面第一刻就諗: 無理由會有野跌落地, 跟住好快就意識到, 可能係靖天跌左落地……..

跟住即刻衝入房, 打開門已經望到靖天大字型咁訓左o係地下, 大喊起上黎……

我即刻叫爸b入黎…… 我攬實靖天…… 佢喊時, 我就不停咁喊….. 隔左十幾秒, 我就摸到靖天既頭仔腫左一大舊, 成個雞蛋咁…………….

我不停咁問爸b, 要唔要同靖天入e院,….. 爸b好冷靜叫我唔好喊, 又抱住靖天, 幫靖天檢查…… 隔左陣, 靖天已經收左聲….. 爸b話安全起見, 都係同靖天入e院check下…… 雖然我喊到收唔到聲, 但都有一刻冷靜….. 要知道, 靖天無流血, 無嘔, 無喊, 入到屯門e院, 可能都要等上好幾個鐘…… 於是我就叫爸b即刻打俾靖天婆婆問佢點算……..再決定入唔入e院……

靖天婆婆問左o的情況後, 就上黎睇下靖天……

點知靖天一見到婆婆, 就o係度笑, 又郁手郁腳….. 仲不停咁講野……. o係度不停咁依依呀呀……好似o係度投訴我好跌左佢落地…….  我望住靖天, 同佢講話佢都有責任, 佢唔應該o係床度郁來郁去, 搞到自己跌左落地…..

點知個衰妹好似識聽咁, 即刻扁嘴, 又o係度依依哦哦, 好似話返我轉頭咁…..  直至我同佢講對唔住……. 佢先笑返, 無野….. 但望住靖天婆婆, 仲不停咁o係度嘈…… 正一衰女包黎!!!!

靖天婆婆坐左大半個鐘, 見靖天無乜野, 開始眼訓, 就叫我抱佢訓覺…… 佢就先回家……

我抱住靖天, 曖左佢一陣, 佢就乖乖咁訓左…….

靖天經過我地24小時既觀察, 似乎都無乜問題…… 但作為人母, 唔擔心就假…… 之前有單新聞, 都係個小朋友跌親, o個刻無事, 點知第二日就……..

到呢一刻, 我同爸b都唔明靖天點可以o係床既中心, 郁到成個跌左落床……  不過經過呢件事後, 我同爸b都決定唔會再將心肝放o係我地張床度…… 因為佢實在係太…… 曳!!!!!  5個月人仔都無, 就學人玩”仆街”……. 幾時先仆到大…….

靖天, 對不起……… 原諒媽咪既粗心………

(130)

Comments

comments